近日有傳鄭欣宜（Joyce）已秘密簽約環球唱片，準備六月全面復出樂壇，神隱兩年的欣宜蓄勢待發。比Joyce更早「神隱」、專心相夫教子的吳雨霏（Kary），2015年下嫁網球王子洪立熙後育有兩女一子，如今已是三個孩子的媽媽。十年前Kary在事業高峰毅然退出幕前，將重心放在家庭生活上，三年前Kary誕下患有先天性心臟問題的幼女Noa後，更需要全天候照顧家庭，一直未聞復出大計。
近年Kary屢成為網民「最想她復出的女歌手」之一，早前與Cookies隊友現身好友Stephy紅館演唱會，風采更勝重前，昨晚(5月18日)Kary又回到舞台，現身鄭秀文（Sammi)於澳門威尼斯人金光綜藝館尾場「You & Mi鄭秀文澳門演唱會2025」，Sammi與Kary合唱《愛是最大權利》後緊緊擁抱，Sammi說：「Kary其實今日把聲有啲唔舒服，但佢話唔怕，有你哋支持，會繼續唱好呢首歌！」全場掌聲。
Kary向觀眾揮手打招呼，說：「好耐冇見大家，大家好嗎？我係吳雨霏。」Sammi對她說：「你唔好成日掛住湊仔，幾時返出嚟唱歌？（我依家咪出咗嚟囉！）哈哈，係咪即係從此出嚟先？要問吓老公同仔女？（問吓佢哋先啦！）」Sammi表示與Kary私下是好姊妹，經常聯絡問候近況。Kary說：「Sammi真係好好，雖然第一次唱歌做嘢，但私底下成日message我、問候我、鼓勵我。所以我要多謝你，你真係一位好好嘅朋友同埋前輩。」Sammi說：「我哋都係主內嘅姊妹，感謝、讚美主！」Kary大讚Sammi造型好靚，Sammi風騷笑說：「係我身材靚！」
Sammi落台換衫，Kary留步台上對觀眾說：「今日發生咗小插曲，就係失咗聲，但係唔緊要，嚟到見到大家，我只係想enjoy呢個舞台，因為我真係好耐無上台唱歌。原來我12年前喺呢個台開過個人演唱會，有啲樂手12年前都有幫我彈過，所以當Sammi邀請我時真係好興奮。你哋想聽咩歌？」
台下起哄，Kary應觀眾要求演唱《我本人》，全場歡呼，相信大家都好期待Kary復出樂壇，舉行屬於她自己的個人演唱會。
圖片:大會提供、IG@ngk
