新一代型男魏浚笙（Jeffrey）憑節目《調教你男友》一炮而紅，由真人騷參賽者，轉型為演員及歌手，外貌實力兼具。Jeffrey外表散出混血王子嘅冷酷，但其實心裡也有調皮多言嘅一面，而且小時候更係一名肥仔，經過努力操練才成為而家嘅肌肉型男。
擁荷蘭印尼血統 17歲做模特兒
Jeffrey家族擁有荷蘭及印尼血統，係一名混血兒，童年就讀地區名校油蔴地天主教小學，早於17歲時已被模特兒公司睇中被招攬拍攝廣告，期間一直以自由工作形式接JOB，更會喺YouTube分享自己嘅衣著打扮及化妝貼士。直至參與拍攝《調教你男友》引來大量支持者，人氣急升，便開始增加出鏡機會，但由於當時Jeffrey仍在求學階段，只有22歲，仲係一名學生，於香港都會大學修讀工商管理課程，並且因答應家人，所以決定完成大學先正式出道。
高峰期190磅 為上鏡極速減肥
Jeffrey之所以擁有如此高人氣，其中一個因素絕對係來自其出眾嘅外貌，不過其實男神是需要鍊成的。Jeffrey曾於訪問中談及過去係一名肥仔，超鍾意食垃圾食物，高峰期試過達到190磅，後來因為身體問題而輕了不少，發現瘦咗上鏡更好睇，加上試過去試鏡時被取笑身形肥胖，而下定決心減肥。
Jeffrey開始時實行16/8飲食法，亦努力做運動，3個月內勁減30磅，但卻坦言當時因為食量少而運動量大令身體變弱，患上厭食症，頭痛又流鼻血，需要花一至兩個月時間才回復過來，因此建議唔好亂用此方法減磅，2022年為咗拍《I SWIM》操腹肌，亦需堅持持續節制飲食，並且不停做GYM 操FIT自己。
反差性格令觀眾有驚喜
雖然Jeffrey擁有一副出眾嘅外形，但表示並唔想觀眾只係見到自己呢一面，更揚言 : 「其實人哋讚我靚仔係一定開心，但有一個位會去到我無論做咗任何努力，啲人都會覺得我『得個樣』，所以我會希望啲人可以睇我耐少少，或者睇得深入少少。」
佢更稱入行後變得更加成熟，對自己高要求咗，對工作會更加執著，而之所以因為真人騷爆紅，相信都係因為形象於觀眾前有反差，更表示 :「當我們未太了解一個人，對他第一印象先入為主，也算正常，但也正正反映了，我們每看一件事情都需要觀察耐一點，才作出定論比較好。很多事情不是表面的簡單，適用於不同方面，人也是，看一本書也是，不會第一眼便知道對方的性格。」
圖片：魏浚笙IG
