近年劇接劇的楊卓娜，繼《黑色月光》與親妹楊茜堯演技大鬥法後，在剛播畢的《奪命提示》素顏上陣演清潔女工劉淑娟，卓娜笑言角色年齡為60歲老婦，跟現實中生靚太形象截然不同，而緊接《奪命》出街的《虛擬情人》中，卓娜飾演的Audrey因為Pole Dance結識了丈夫Norman（黃子雄飾），由於兩劇疊住拍輯，令卓娜一度迷失，「Pole Dance角色要弗之餘，塊面唔可以瘦，因為個角色應該係要靚嘅，但《奪命》個角色又要好殘喎，當時真係好掙扎點兼顧兩個角色。」
為了演好《虛擬情人》Audrey一角，卓娜臨急抱佛腳苦練Pole Dance，「我在劇中跟黃子雄感情出現裂縫，一直日夜跳鋼管舞，希望挽回愛人嘅心，有一份深情寄望，跳出嚟要有美感、留意姿態，又要有深層嘅愛呈現出嚟。」
更困難的是，卓娜在接到劇本後才得知角色需要跳鋼管舞，正值身體備受肩周炎困擾，連做基本動作都力不從心，「2022年3月開始，我已經患有肩周炎，膊頭同手都郁唔到，接完角色之後先知死，自己身體有問題，周身都唔妥，我就好驚。」
一驚之下，為了在短時間內pick up鋼管舞，卓娜不惜豪花巨資報讀瑜伽課程，由拉筋學起，「我報咗一個幾萬蚊嘅瑜伽課程，逼自己做運動去拉筋。拉筋對我嚟講真係幾有難度，因為都一把年紀，而家先嚟學，真係好辛苦。」
卓娜早前在社交平台貼出她與家人一起上瑜伽班的照片，她竟以「風乾臘肉」形容自己體質，「感覺自己係風乾臘肉『硬曬』，全部吊起嚟晒，或者係刑埸，受刑中，不過OK嘅，自我感覺良好，仲生存緊。」為角色做足準備，不停挑戰自我，卓娜絕對是一位不可多得的專業演員。
圖片：IG@lennayeung
