歌手洪助昇（Aiden）、何珮(HOPUI)帶住各自嘅新歌，日前現身新城廣播接受T.MAX及J.Y 主持的《Z世代咪高峰會》節目訪問，洪助昇自爆自導新歌MV好辛苦，何珮新歌同人生感悟有關，希望大家尋找光嘅時候唔好忘記我哋就係自己嘅光。
洪助昇（Aiden）宣傳新歌《別想跟我再和好》，T.MAX就話Aiden通常畀人一種性格内斂嘅感覺，好少見佢會用咁强烈嘅字眼，問佢點解新歌會係呢個歌名，Aiden就笑住講：「要做吓狠嘅男人，對唔好嘅人同關係要拒絕和好。」
講到Aiden近況方面，今首新歌距離上次已經快相隔一年，Aiden就透露：「自己一直都有keep住拍片同剪片，試吓做啲新野，同埋等緊適合自己嘅作品。」今次連自己新歌個MV都係自己做導演，「自己係一個好狠嘅導演，由中午一直拍到凌晨三點，冇畀佢哋停过。」另一個最大感受係覺得做导演好攰，每日都只可以瞓一两個鐘，feel到身體喺到休息，但眼睛同手指都喺度郁緊，雖然辛苦但係都好有趣。
而何珮新歌《喜劇開場了》，作爲自己嘅第九首廣東話歌，何珮就話：「首歌概念就係人生好似喜剧咁，可能看透咗現實有好多嘅悲同苦，但係可以當成喜劇咁，開始咗就繼續演落去，唔係扮出嚟，係要真正接納，去做好人生呢場戲。」
四人分享完自己睇過印象深刻嘅騷之後，講到何珮出道四年，終於都要開自己嘅個人音樂會，係四月尾舉行，會唱曬自己寫嘅歌同埋cover其他歌手嘅歌。講到個騷嘅主題，何珮話：「今次個人音樂會嘅主題係黑暗中發光，希望大家係面對唔同嘅狀態，係尋找光嘅時候唔好忘記我哋就係自己嘅光。
圖片：新城廣播
