Gin Lee李幸倪日前現身新城廣播，參與新城廣播本年度首部廣播劇《現在就愛》，特別聲演高中班主任Miss Lee一角，同時宣傳新歌《無愧於當初的我》，Gin Lee仲透露希望盡快喺紅館開騷！
喺《現在就愛》當中聲演Miss Lee嘅Gin Lee係劇中寄語同學要永遠記得自己嘅初衷，雖然成長中會面對好多容易令人氣餒嘅問題，但無論自己成長成點，都唔好忘記自己嘅初心。
被問到有冇做老師嘅諗法，Gin Lee坦言：「都幾鍾意分享，幫小朋友、或者幫後輩出道做歌手，我都enjoy分享同教學嘅過程。」又講到如果做老師會想教邊科，Gin Lee就話：「都係教音樂方面囖， 或者係心理方面嘅輔導，分享吓自己作爲歌手出道多年嘅心路歷程，因爲心理狀態對歌手都係好重要嘅一個部分。」 Gin Lee更笑稱自己會好投入，「可能會花很多時間係教學方面，因爲自己係好上心嘅類型，可以分享嘅嘢都會分享。」
講到新歌方面，《無愧於當初的我》咁啱同《現在就愛》想帶畀大家嘅message都係一樣，希望大家都可以不忘初衷，凡事都要全力以赴，只求「無悔」二字。Gin Lee表示：「盡力去做，做好佢，咁就已經好足夠。」同時都希望自己排到期，可以成功喺紅館開演唱會，然後同大家喺演唱會見面並努力繼續帶嚟更好嘅作品。
由理文商業中心贊助的廣播劇《現在就愛》共分為五集，講述四位同學在老師的鼓勵下，製作了一個時間錦囊。十年後，他們決定重聚並打開時間錦囊，意外揭示兩段微妙的甜蜜關係，並且在福岡貓島留下愛的足印。節目將於4月7日至11日下午2時半在知訊台的《QK玉瑛室》節目中首播，並於晚上十一時的《Bilibala開大喇叭》時段重溫。
圖片：新城廣播
