第39屆華鼎獎日前（23日）於澳門舉行，去年憑《不日成婚2》首獲金像影后提名、最後與獎項擦肩而過的衛詩雅（Michelle），終憑電影《破·地獄》獲得第39屆華鼎獎「華語最佳影視女演員」，初嘗影后滋味。
近年在屢獲電影獎項提名的Michelle表示這個獎項對她來說太重要，「對演員嚟講係一個肯定。亦都係提醒人哋：『我仲喺呢行㗎，大家可以搵我演戲。』憑《破·地獄》呢套電影得到嘅獎項即係代表大家好喜歡我哋嘅電影，所以好開心。」今年6月尾，衛詩雅宣佈與拍拖兩年半、在中環開設大型醫學美容中心的醫生男友周祉安結婚，絕對是雙喜臨門。
Michelle在電影《破·地獄》飾演一名救護員，她表示這個角色無論在體能及心理上都有很大發揮，「心理上嘅話就係大家睇過呢套電影就會明白嗰種沉鬱，長時間培養沉鬱嘅情緒，每日同屋企人好多矛盾、好多爭吵，所以嗰段時間係難過嘅；體能上除咗要練一啲儀式上嘅嘢，亦都要人做好多體能體力嘅瞓練，因為角色係一個救護員，自己對呢方面要求比較高，好希望最貼近個角色，所以有嗰一刻開始我每日都去做gym，嗰段時間體能真係幾好，同埋大隻咗好多，經過呢啲瞓練，之後我真係可以『稱」到個人上救護床。」
最難忘的是跟許冠文拍攝一幕洗澡戲，令她學到何謂敬業樂業，「Michael神喺戲入面飾演我爸爸，有一場戲係我要幫佢沖涼，我記得拍攝嘅時候係冬天，好凍，所有劇組都擔心，佢反而話：『唔緊要㗎，你哋拍到OK先。』佢為我哋嘅畫面、劇情需要行先，好唔錫身咁樣，我又心痛，覺得好深刻又覺得好犀利，好尊敬佢，喺佢身上面絕對學到乜嘢叫做敬業樂業。」問到會否增加來屆金像獎提名的信心，她坦言：「感覺會實在啲，信心係高咗嘅。」
出道16年的衛詩雅起步點在電視台，2008年因拍攝《四葉草之盛裝舞步愛作戰》獲金牌經理人霍汶希（Mani）賞識成功簽約英皇成為演員，拍攝超過40部電影，Michelle曾表示Mani原意想捧她做歌手，惟試音後公司認為她循演員路發展會更好：「佢話你做戲ok，你去拍戲啦，拍唔到戲個啲先唱歌啦，所以之後大家對我唱歌無再任何希望。」
甫踏入影圈拍愛情電影《很想和你在一起》便做女一，但往後日子經歷事業高潮跌落，不時要降呢演回大配角，有時甚至隱形到連劇組茶水阿姐預備水杯也沒有她名字時，「有段時間我都係低潮期，我會反問自己係咪演得好差，有段好長時間無人搵我拍戲，我會好質疑自己，但我又好鐘意演戲，所以我會主動爭取機會。」奮鬥16年，衛詩雅沒有錯過任何一個機會讓別人看到她的演技，成就新一代影后誕生，恭喜晒Michelle！
圖片：大會提供、IG@michellewsn
