初為人父的林奕匡（Phil），自8月尾兒子Darrien出世後，與太太李靄璣沉浸在湊B生活中，作為新手爸爸又是創作人，Phil份外感性，由知道老婆懷孕到親手剪臍帶，每個moment都想紀錄下來，內心太多感受，「作為新手爸爸，起初係有啲雞手鴨腳唔知點算，我咁大力，佢咁脆弱，佢成日郁身郁勢，我唔敢同佢鬥力，怕整親佢，驚又抱得佢唔舒服；而家佢硬淨咗，我又多咗經驗，兩個開始有啲默契，佢一日比一日認到多啲我，每日都會俾多少少表情，我哋嘅connection明顯愈嚟愈多，所以每日都愈嚟愈開心。」
Phil表示，他已開始習慣當一位爸爸，人生好似大躍進，多了份責任，要懂得照顧人，而身邊親友，亦會叫他做「阿Phil爸爸」，為此也開心不已。Phil說Darrien未出世，隔住肚皮與他接觸時，就已經很想為囝囝寫一首歌，「好多想法，寫咗好幾首歌俾Darrien，當時一心只係想用嚟記載同送俾佢，至於有冇機會製作成一首歌，我自己都唔知道。」製造音樂過程也像生BB，但當決定要做時，Phil考慮到自己的歌庫中，以鋼琴為主的ballad作品為數不少，但以結他創作的則比較少，就想到要以結他創作一首歌送給Darrien，Phil續說：「今次就以寫首歌送俾囝囝為由，邀請咗新加坡音樂人Marcus一齊創作，他的結他有一手，《搖籃下的歌》是我們隔空合作寫的歌。」
準爸爸隨時ready入錄音室，誰不知產房的門率先為他打開，「錄音schedule一早決定咗，但唔知佢幾時出世，呢個就係天嘅安排，啱啱佢出院嗰日我就去錄音。其實好得意，情感上係滿滿，但嗰一刻其實好難錄歌，因為情感泛濫，不停係唱唱下就喊。」
Phil感情如此澎湃，全因林寶的歌詞神預言了一切！Phil分享到：「我好鍾意歌詞中嘅幾句：『今晚心情 怕你亦也許難聽得懂幾句 唯願我枕邊跟你伴隨』 BB啱啱出世嗰陣，我推住BB保護箱行出手術室，當時媽媽仲喺手術室，得我同佢獨處半個鐘，當時我幫佢影咗啲相同影片，其中一條片，我有講到：『知道你唔知而家發生緊乜嘢事，亦都唔會有任何記憶，但係我會幫你拍低記載一下。』呢句歌詞，就好係我嘅心聲、心情，現實生活中我真係實現咗呢個畫面。」
圖片：大會提供
