黎瑞恩（小恩子）將於10月19至20日假西九文化區戲曲中心大劇院舉行《V Union恩賞．演唱會2024》 ，是次演唱會是為「快樂港仁」籌款，讓有需要的中風病人獲得免費中醫診療服務，日前黎現身新城接受《開心大派對》訪問，家燕姐笑言好耐無見對方，早幾年二人常在《流行經典五十年》碰頭，「小恩子好緊張自己演出，有幾次錄影，導演都已經收貨，她都會要求『可唔可以嚟多次？』」，小恩子是完美主義者，坦言有少少唔完美都瞓唔着，故每次開騷前仍會緊張失眠，今次亦不例外，上星期連續發燒了兩天要戴口罩出街，為怕再受感染更謝絕應酬，唯獨家燕姐的訪問邀請，她一口答應。
幼承庭訓，一對仔女遺傳了媽咪唱歌天份，18歲仔仔Tyrone更是天生perfect pitch（絕對音感），女兒Sheree則愈唱愈好，三口子有同一興趣，小恩子卻表示兩姊弟童年時，並不知道媽媽是歌手，長大後見到媽媽開演唱會，才知道真相。提到一對寶貝，節目後小恩子接受「新城八大家」訪問，聊到育兒心得，向大家分享如何跟和子女做朋友，「囡囡黐媽咪多啲，好多心事講；阿仔冇咁感性，會直接話『得啦』、『好啦』，女仔就把口話『好』，內心其實有好多問題。」
跟媽媽餅印一樣的Sheree，自小培養跟媽媽訴心事的習慣，成年後母女分享更多，「阿女有時會提點我，指出我有問題的地方，我覺得我們是互相成長。」對孩子要多讚美，小恩子絕對做得到，「不得不讚我個女，她真的不錯，我性格都樂觀，但沒有在廿歲這個年齡階段就懂得樂觀，我非常欣賞她。」談戀愛是少女必經階段，小恩子會鼓勵女兒介紹異性給她認識，「必需要帶返嚟畀我見，我要同個男仔傾吓偈，（女兒拍拖你會擔心？）由細到大都教她要保護自己，未結婚就唔好做一啲唔應該做嘅嘢，我覺得嗰樣嘢都好緊要嘅，我相信她做得到。」
對於女兒未來的婚姻，抱開放態度？「係開放嘅，都是叫佢唔好結婚，總之要自己開心，佢見到嗲哋媽咪係咁樣，都會令她覺得唔使咁早結婚，或者唔結婚都得！我成日覺得愛情係，初頭拍拖一定好甜蜜，到後期變成習慣……如果要keep一段好長久嘅愛情，真係好難，更何況而家呢個世代太多引誘，佢哋自己會識諗，我都管唔到太多。」作為新派媽咪，小恩子話仔女開心便足夠，「佢哋唔結婚唔生仔都得㗎，我唔恨湊孫，已經湊大咗佢哋，唔好再畀個BB我湊，哈哈哈。」更多精彩訪問內容可重溫新城知訊台《開心大派對》節目 ，收聽網址：https://www.metroradio.com.hk/MetroInfo/
圖片：新城、FB@黎瑞恩VivianLai
