陳奐仁（Hanjin）將於10月5日假東蒲胡李名靜體育館舉行《陳奐仁Raw Jazz 15 周年爵士音樂會》，慶祝入行15周年，早前Hanjin到新城廣播接受黎莉主持的《勁爆樂勢力》訪問，他表示：「今次音樂會中文名叫『攞着數』，大家嚟攞吓我哋啲着數，開騷前會有酒飲。」
開騷在即，Hanjin數月前已開始操肌，繼續將筋肉人爆肌身材推上高峰，他在社交平台貼上這15年來的身材變化，由2009年戴黑框眼鏡的可愛肥仔造型開始；到2019年弗出8嚿腹肌，震撼全香港人，直到2024年今日，在15周年紀念演唱會開騷前夕，仍能保持令人羨慕的鋼條身形，他笑言：「為咗賣飛可以去到幾盡？每位賣飛的朋友都可以同我合照，瘦到又keep到，唔使跑、齋行路都可以操到咁，係咪用咗AI呀？到時你哋睇下囉。」
Hanjin音樂才華橫溢，身兼作曲家、填詞人、唱片監制、混音師、歌手、歌唱評判，他接受黎莉訪問，細訴推出首張《Raw Jazz》爵士碟時遇上阻滯，「一開頭唔係想做Jazz，我想做搖滾明星，去酒吧唱搖滾歌，參加搖滾比賽，攞晒啲獎，覺得自己應該有機會啦，又唱得又彈得，點知唱片公司個個都話我唔睇得，個樣同音樂好唔夾，所以嗰時搵唔到人出碟，我一句粗口，咪自己出囉，後來出錢搵朋友幫手出咗隻碟。」
Jazz在香港，由始至終都是冷門的音樂類型，「賣唔好冇人怪你，好彩隻碟成績都唔錯，跟住再做其他流行碟，又開紅館騷，我又淆底，問主辦單位有咩可以再好啲，佢話『你可以紅啲』，後尾為咗想紅啲就去咗拍劇，拍完劇入咗屋就紅咗啲。」Hanjin透露當時走出街，會有不少途人跟他打招呼，去街市買菜又會有不少贈品，「幾好呀，好似我偶像周潤發話齋，佢話佢有七百萬個親戚。」黎莉問Hanjin在他「紅咗啲」的時候可有感到開心？Hanjin 坦言沒有，「我擺明唔係劉德華嘛，尤其係嗰一刻，我只係一個比較出名嘅音樂人或者唱片監製，我憑電影《李小龍》攞金像獎最佳新演員，除咗我父母好開心、我啲朋友好開心，同埋劇組好開心，我冇見到咩好大分別，啲影帝成日話一攞金像獎，你之後一兩年都唔使撈，因為你一攞獎，啲人覺得你加咗價。」
Hanjin至今仍繼續堅持他的音樂夢，但其實要搵錢有很多不同途徑，Hanjin笑稱，「我諗我唔夠貪錢，又好固執，想追個夢，我冇黃貫中咁靚仔，不過經歷咗咁多嘢都開心，拍戲有獎嘅，又喺香港搵到一個舒適嘅生活，有七百萬個親戚，所以人生好理想。」陳奐仁足本訪問請重溫黎莉主持的《勁爆樂勢力》，收聽網址：https://www.metroradio.com.hk/MetroInfo/
圖片：新城、IG@hanjintan
