昨午新城廣播的《開心大派對》直播室非常熱鬧，家燕姐請來兩位拍檔冼靖峰（Archie）、關楓馨 （Fabienne）做嘉賓，分享拍攝烹飪競技節目《家常便飯爭霸戰》趣事。家燕姐話拍攝期間，集集品嘗參賽者用心烹煮的家常便飯，胃口大開，奇怪Fabienne點解食極唔肥？又驚訝拍檔廚藝了得。曾留學英國的Fabienne擅煮西餐，笑言白汁意粉、煎牛扒等完全難不到她，反而欣賞參賽者對家常便飯的心思，從中偷師，學習家常小炒的技巧，她說：「平時煮蕃茄炒蛋，大部份人都會落茄汁，但原來呢味餸要落醋去煮先好味。」
炮製家常便飯是主婦日常，想當年家燕姐都做過「煮婦」，她憶述：「我會計住budget買餸，知道每餐飯大概用幾多錢買材料，做家庭主婦要精打細算。」
《開心大派對》後，家燕姐、Archie與Fabienne跟「新城八大家」分享他們心目中的Comfort food。Archie跌入童年回憶中，掛念公公的味道，「幾歲大時，每逢星期五放學都會去婆婆公公屋企食飯，公公好鍾意煮他拿手的『蒸水蛋』，有一個小秘訣，他不會直接隔水蒸，是會先放入微波爐……」公公過世後，Archie再吃不到這味道，他一臉懷緬：「就算我自己喺屋企用公公教我的方法煮，都煮唔出嗰種獨有嘅味道，現在每次食到蒸水蛋都想起公公。」
Fabienne的Comfort food之選是關媽媽的愛心小炒「菜脯豆腐粒」，她說：「呢味是我同妹妹最鍾意食嘅，材料有菜脯、三色椒及硬豆腐，硬豆腐一定要去街市豆品老舖買嘅嗰隻先好味，呢味餸好好送飯，我去朋友屋企好少食到呢個餸，是我哋關家一道自家菜式。」
曾拜師西餅王后李曾超羣女士，惡補廚藝一年的家燕姐，坦言「蒸肉餅」是生命中不可劃缺的一道家常菜，家燕媽媽版本的蒸肉餅必定要放魷魚、馬蹄及冬菇，「我自己細個屋企有煮呢味餸，到我做咗媽媽又會煮畀小朋友食，而家我啲小朋友變晒大人，輪到我新抱落廚煮畀我食，一代傳一代。」家燕姐話蒸肉餅要好食，料要多要分布均勻，豬肉要買少肥，半肥瘦就最理想。」
家的味道，吃的是回憶。屋企人煮的家常便飯，永遠是最能滿足胃口及療癒心靈，是山珍海錯都無法取替的人間美味。
圖片：新城
