近日忙於宣傳新歌《我很不愛你》的陳健安，日前來到新城廣播接受昆頓節目《說故事的人》訪問，表示有望年尾可以推出個人專輯。訪問後安仔跟「新城八大家」談到左腳前十字韌帶斷裂的康復進度，他笑說：「仲未落場踢到波，但傳下波、踢兩腳都可以。」安仔用正面思考面對困難，不時跟自己對話：「我要踢得返波！」康復速度尚算理想，早前又再與78歲母親同遊日本福岡，「在2017年C AllStar休團之後開始定期抽時間帶阿媽去旅行，成日會諗起，細細個她帶我去唔同嘅地方，好多第一次都係媽媽畀我的，不如趁而家有能力，慢慢轉變一下身份角色，輪到我帶她周圍去。」
陳媽媽先後經歷丈夫及大兒子離世，曾經難以釋懷，晚晚以淚洗臉，陳健安每次在社交平台貼出與母親的旅行照都會話，「我又帶你老婆去旅行啦！」似是向天上的爸爸報告近況。網友大讚安仔孝順，他說沒想過孝不孝順的問題，「仔女要孝順父母，父母都可以孝順仔女，我跟媽媽處，有時都冇當佢係阿媽，而是跳出母子角色，到底她係一個點樣嘅人呢？好似舊年我哋去北海道，佢從來唔食生蠔，我話不如你食一啖啦，喺香港食唔到呢個味道，點知佢又肯食喎；見到山上面有直升機試玩，又主動話好想玩，講到玩仲積極過我！」
二人前親子遊？這兩三年與媽媽創造了不少難忘回憶，大前提是大家都未去過的旅遊點，「大家一起去感受第一次，慢慢發現我阿媽是一個幾好的travel buddy，我們相處似男女朋友，但我又唔會就晒佢，大家好開心咁相處。」陳媽媽太幸福，安仔繼續分享與母親的相處點滴，「每次去旅行，我都會同媽媽住一間房，以前細個住公屋，我們都沒有隔房，幾兄弟姊妹都是打地舖，又或者迫在上下碌架床，唯有大個去旅行住酒店，先有機會同到阿媽兩個人同房。」陳媽媽今年78歲，是一位快樂老人，「阿媽唔似呢個年紀，佢成日都同我講『我冇白頭髮㗎，連染髮都唔使。』」安仔要繼續為媽媽創造更多快樂回憶呀！
圖片：新城、大會提供
