黃奕斌（Hugo）昨日現身新城廣播，分別接受由麥卓華主持的《音樂五重奏 – 音樂.聲.華》和黎莉主持的《勁爆樂勢力》訪問，宣傳其第一首派台作品《currenT》。Hugo指currenT可解作電流、現在、現時，「其實係Nikola Tesla發現咗交流電呢樣嘢，但大家淨係知道愛迪生呢個人，可能而家網絡發達咗，開始了解Nikola Tesla，我相信Nikola Tesla喺當時嘅年代，一定有好多人唔相信佢有咩成就，唔覺得佢將來係一個好偉大嘅人；而我係想用Nikola Tesla嘅故事帶出我想講嘅嘢，可能我本身唔係一個好有唱歌天份嘅人，但唔緊要，如果堅持嘅話，終有一日一定有回報，縱使唔係好大嘅成就，但一定會有得著。」
Hugo透露每次入studio都會感到很緊張，還自爆自己有一個僻好，「我慣咗唔著鞋，唱歌會舒服。」黎莉問他：「第一次入studio有冇著鞋？」Hugo說：「一開始有著，我唔熟嗰個環境，如果唔著鞋好似有啲怪，所以有啲緊張，但有次錄rap，唔著鞋係會唱得輕鬆啲。」不過他笑言錄《currenT》時，是穿著拖鞋。
他表示會以王嘉爾為目標，「佢係一個喺好多唔同範疇上面都好犀利，亦都係喺時裝方面一個icon，點樣喺咁多方面都咁優秀，一定有我學習嘅地方。」曾考入北京中央戲劇學院的Hugo，除了喜歡唱歌跳舞，他更愛演戲，問他有沒有想合作的演員？Hugo向《新城八大家》表示：「我好想陳豪合作，（可以飾演兩父子？）做我哥哥都ok，我覺得佢好有藝術家氣質，（有冇見過陳豪？）見過，但我怕羞，唔敢同佢傾偈，唔知點同前輩講嘢。」
對於有報道指男團LOONG 9在官方社平交台出post，透露將會推出新專輯，不過其中四位成員Hugo、冼靖峰、文佐匡和奧利均沒份參與。Hugo表示：「點樣組合、咩形式出歌，都係由公司嘅決定，所以冇辦法講得太清楚。（公司想你哋單飛發展？）其實入團都係希望個人發展得更加好，暫時我哋喺男團入面機會係少咗，但我會調轉諗，咁樣更加可以focus個人事業上。開始會唔會有少少up sad？我覺得一定會，因為始終都係機會，但而家大家調整完心態，最緊要都係focus自己嘅發展上。」
