「8.28」是汪明荃77歲正日生日，每年Liza姐都悉心打扮跟家英哥及屋企人食飯慶祝。近年阿姐活躍社交平台，更不時拍片影相跟廣大觀眾分享生日喜悅。大日子在即，早前羅家英與謝曉瑩到訪新城廣播接受《原來生活好快樂》訪問宣傳新歌《金陵幽蘭》。及後跟《新城八大家》提到阿姐生日，家英哥即滔滔不絕。
如何準備這個「年度大project」？家英哥話每逢紀念日，必會準備一大束玫瑰花給太太，送花表心意仲未夠，回憶起對太太的第一印象仲竟然話……
點樣同壽星女慶祝生日？「每年都會請她食飯，大家開開心心食番餐，玫瑰花就一定會準備，是旦啦，我都係一時時。叫我唱歌畀佢聽？哈哈哈。」家英哥主動報料，表示年尾阿姐會有新工作任務在身，即將會好忙好忙，問他會肉赤老婆開工辛苦，會擔心她冇覺好瞓？他就話：「又唔會，但我最近跟她分享拍攝港台劇的現場情況，她話都擔心自己脾氣唔好，驚開工時會易忟憎。」她接到新角色會跟你商量？「唔會，拍電視是她強項，我反而要跟她學習，因為這是她熟悉的範疇，不用跟我交代。」
問家英哥最欣賞哪套阿姐主演的劇集？「她的劇集我未睇得晒，《我的野蠻奶奶》幾好吖，但我特別鍾意《創世紀》。」阿姐主演的《創世紀》在1999年首播，是當年的台慶劇，Liza姐將優雅聰敏、剛柔並重的霍太方健平演得相當細膩，難怪連家英哥都難以忘懷。
「如果講她早期的劇集作品，我就冇睇囉，當年屋企冇電視吖！但對《家變》入面的洛琳我都有印象，因為當年她成日都在畫報出現，尤其個髮型就最經典。」問到對阿姐的第一印象，家英哥一臉回味，「我後生時鍾意柯德莉夏萍，阿姐面型都是瘦瘦長長，有時個樣好惡、忟忟憎憎，最初睇，嘩，呢個女仔都幾巴閉喎！鬧人唔使本喎！哈哈哈，講笑講笑。」
阿姐在你面前是小鳥伊人？家英一臉甜蜜道：「她欣賞我做人的作風，我都是一個孝順仔，在她過往認識的男士當中，可能佢會覺得『呢個男人啱我！』。」夫妻相處之道，盡在不言中，預祝Liza姐生快樂。
圖片：新城
