李幸倪（Gin Lee）今日現身新城廣播，接受由譚玉瑛、何基佑和麥皓兒主持的《QK玉瑛室》訪問，宣傳新歌《新牌仔》。適逢下周一是Gin Lee生日，一眾新城廣播主持程凱欣、黎莉、譚玉瑛、何基佑和麥皓兒送上生日蛋糕為她慶祝，Gin Lee感驚喜，連番表示：「好Sweet呀！」
Gin Lee事後表示真的意想不到，「今日要做好多訪問，心情係工作mode，估唔到大家各位DJ會記得我嘅生日，同我切咗個蛋糕，好開心。（下周一有冇假放？）我請咗假，但冇特別慶祝活動，因為一個休息已經好奢侈，呢排宣傳期真係有啲忙，感覺負荷唔到，瞓得唔好，跟住又好緊張，而家我搞埋Fans Club，好多嘢要處理，所以好消耗精神同體力。」
雖然沒有特別慶祝活動，但Gin Lee透露已報讀動物傳心課程，「我本身養兩隻貓貓，一隻走咗，而家剩番一隻，佢今年13歲。」Gin Lee指自己一直都很想學，可惜時間遷就不到，剛巧遇到老師開班，Gin Lee於是立即報名。
Gin Lee表示上一隻貓貓是15歲離開，她就意識到現時的貓貓開始老，「佢有骨刺，呢排成日要帶佢做針炙。（養咗佢幾多年？）9年，其實我同佢都溝通到，因為主人同小動物都會有個感應，但係我好想知道佢有咩需要，例如『我呢度好痛！』，咁我可以幫到我，我而家靠估，淨係知道佢唔舒服，但係邊個位置呢？我就好想學到，可以幫到佢，而且我有好多同事都有小動物，咁都幾好嘅！」
圖片：新城
