樂隊Hedgehog及Revery昨日在新城廣播，接受T.MAX（海淦清）和JY主持的《Z世代咪高峰會》訪問，Hedgehog宣傳新歌《大有》，描述貫通新蒲崗幾條街道的大有街；而Revery則宣傳歌曲《靈魂奇遇記》，討論生命是甚麼！
Louis@Revery說：「我哋寫歌嗰陣時，發現好多人唔開心到想結束自己嘅生命，我哋睇新聞都覺得好沉重，所以想寫首歌去探討生命係乜嘢？其實最緊要係接受自己嘅缺憾、不足，認清咗接受自己呢啲，先至令自己生活過得正面一啲。」JY指他的戾氣較以前細？Louis反問：「乜我哋嘅戾氣好大咩？可能寫得好多歌，想同觀眾去探討深入啲嘅話題，其實我哋都有正經嘢想講。」King@Revery透露他們有想推出專輯的方向。
對於Hedgehog的新歌《大有》，與新蒲崗的大有街有關，Paco說：「因為我哋喺呢度建立咗自己品牌，呢個地方對我哋一點一滴都好深刻，例如打機、度歌，想透過呢首歌話畀大家聽，Hedgehog喺新蒲崗有一個Wonderful嘅Life。」JY指Hedgehog對上首歌《對面海》，下首歌可以寫其他區，Paco說：「我住屯門，如果大家唔反對，下首歌寫屯門。」點知隊友Tracy立即回他：「我反對，因為我住港島，咁不如18區都寫一首。」
JY指Hedgehog如果會出專輯，專輯名可以叫「香港」。Tracy又指：「呢首歌除咗講我哋嘅生活之外，更加想講喺大有街唔同文化嘅人，除咗夾Band，仲有人開花舖、整指甲、學唔同語言嘅舖頭，都係林立喺工廠區入面，而且呢度又好近民居，有好多好嘢食，我哋好似有一個責任，我哋唔可以亂咁講呢條街。」T.MAX笑說：「越聽越似旅發局，所以Z世代嘅朋友真係想踏入呢個圈，唔好覺得啲嘢唔可以寫，一條街都得，旅發局冇搵佢哋，真係冇乜嘢唔可能成為題材。」
《Z世代咪高峰會》節目重溫：https://shorturl.at/OymnX
圖片：新城
