雲浩影（Cloud）日前與60位「迷雲黨」（Cloud Fans暱稱）開Party慶祝生日，場地布置精緻，門外放了Cute爆的「小雲」人形紙牌，Cloud見到都忍不住要打卡。場內還有大量Cloud的靚相，更設有「心事貼貼貼」展版，讓「迷雲黨」寫下心底話，Cloud感激大家的支持和陪伴，剖白內心世界時一度感觸落淚，場面溫馨感動。
會上，除了玩遊戲外，還有一個心底話環節，當Cloud讀出「迷雲黨」的打氣說話，令到Cloud大為感動，她亦感性地說：「出道第三年，我覺得自己大個咗好多，但我都係之前傻更更嘅嗰個我。呢段時間不斷學習、努力，想成為更好嘅歌手，想令『迷雲黨』感到自豪，我覺得好似慢慢做到。好感激大家一直陪喺我身邊，好開心見到好多新面孔，更加開心好多舊面孔依然喺度。」此時，Cloud已經忍不住落淚，回過氣後，她續說：「講自己真心說話嘅時候，大家全神貫注望住我，Feel到好多愛，係一個好珍貴嘅Moment。」
到了切生日蛋糕環節，Cloud看到米線造型的生日蛋糕，當刻興奮得拍手兼跳起，並開心地說：「因為我TG（Telegram）個名叫『最愛食米線』，我本人亦都好鍾意食，蛋糕上面仲有牛肉、魚蛋、墨丸同金菇。」這時，「迷雲黨」再為壽星女送上天使造型的「雲寶寶」公仔，Cloud愛不釋手說：「『雲寶寶』係迷你版嘅我，佢有唔同嘅衫可以換，最重要係佢個Pat Pat好翹，有做運動嘅，好搞笑。又一年聚首一堂見到大家，又一次大家幫我慶祝生日。」對於生日願望，Cloud表示希望自己開開心心、身體健康、自在地做自己想做的事。
此外，Cloud於9月將首次參演舞台劇，現時正排練得如火如荼，她希望明年能夠舉行個人演唱會，Cloud說：「好多歌曲製作中，希望到時有一個好精彩嘅演唱會帶畀大家。」生日會結束前，Cloud與「迷雲黨」逐一合照，她表示：「知道今次嘅生日會有限額，希望嚟唔到嘅朋友唔好灰心，我哋喺其他活動再見！」
圖片：大會提供
