由新城知訊台主辦，信和集團、奧海城全力帶動《Z世代咪高峰Show之齊撐運動員》活動，邀得許廷鏗、鄧小巧、林智樂、林芊瑩、力臻、黃明德、蔡愷穎、MATCH到場，以歌聲為中國國家隊及中國香港隊運動員打氣，T.MAX和JY則擔任活動主持。
提及日前許廷鏗與中國香港隊男子單打羽毛球代表李卓耀打波，他指對方打完奧運，完全沒有疲態。JY問：「對住你係咪出100%全力？」許廷鏗笑說：「梗係唔係啦，點呀？我咩歲數呀？」他又表示雖然愛打羽毛球，但很難Book場地。JY指「新城體育會」逢周三會舉行羽毛球活動，許廷鏗說：「我知呀，馬生（新城廣播首席營運總監馬浚偉）都打。」T.MAX說：「搵一次過嚟同馬生切磋下？睇下馬生勁啲定李卓耀勁啲？」許廷鏗立即語窒：「唔…喺呢個台正常答馬生，但應該真係李卓耀勁啲嘅…不如我哋唱下歌吖，好唔好呀？」
事後，許廷鏗接受《新城八大家》訪問，他指自己很幸運，跟李卓耀打羽毛球，「佢返咗嚟香港，有幾日休息都嚟同我打波。（本身認識對方？）我同佢嘅經理人有打開波，不過佢經理人好渣，但李卓耀就好勁，對於我嚟講，佢係載譽歸來，佢世界排名十七，我完全唔夠佢砌，我輸十一比二，去到十一分我已經好攰，但我贏到兩分已經好叻。」許廷鏗指李卓耀雖然在巴黎奧運未能晉級16強，但大讚他的心態很好，「我同佢打嘅時候簡直感同身受，佢都有同我分享，當打波嘅時候畀人打亂咗個節奏，而自己嘅呼吸好難調整，準繩度都會下降，但佢都話而家係儲經驗嘅階段，仍然係一個好當打嘅歲數，四年之後再有奧運嘅時候，希望會有更加好嘅成績，我覺得以第一次入奧運嘅選手嚟講，佢係超額完成。」
至於鄧小巧指自己不斷重看中國國家隊的全紅嬋施展的「水花消失術」，她笑說：「佢好犀利，同埋佢好得意，當然我亦有睇好多中國香港隊嘅賽事，但好多賽事都係半夜進行，我唯有第二朝起身睇番，因為我真係捱唔到，去到十二點幾已經眼瞓。」她又指運動員能夠去到奧運這個大舞台，已經是世界前列的排名，無論成與敗都是一個肯定。
曾是乒乓波校隊隊員的力臻，直言欣賞乒乓波賽事最有共鳴，「尤其是團體賽，因為我細個都係打團體賽多啲，好需要團體精神，令我諗番起中學時候嘅回憶，而且我做過幾年乒乓波球嘅助教，試過帶人出去比賽，見到教練同球員互相鼓勵、傾偈，感覺好強。」黃明德曾是排球校隊隊員，以前只會欣賞排球賽事，但從上屆東京奧運開始，張家朗奪得金牌，漸漸多關注中國香港的體育。林芊瑩就有看划艇賽事支持中國香港隊，還有欣澳游水、劍擊、乒乓波等項目，「每個賽事都睇到我標晒汗。」
兩位主持T.MAX和JY直言追看賽事至通宵達旦，T.MAX笑說：「我哋每次開咪嘅精神狀態都係好恍惚。」JY表示喜歡看球類賽事，如籃球、足球、排球、乒乓波、手球，而羽毛球賽事，他笑言被日本女選手志田千陽吸引，T.MAX則說：「我都係日本，但係乒乓波嘅張本智和，佢打得好好，我亦都鍾意睇排球、跳水，全紅嬋真係好勁，真係水花消失術；仲有足球方面，法國對西班牙嘅金牌戰，我睇到頭十五分鐘以為睇完，點知踢到後面，三比三，再加時西班牙入多兩球，真係好好睇。」
此外，適逢力臻在8月7日牛一，黃明德在8月12日生日，新城廣播特意向兩人送上生日蛋糕，他們感到十分驚喜，黃明德開心地說：「真係超驚喜，我感受到呢個行業帶畀我嘅溫暖，因為係第一個同我慶祝，真心好surprise、好開心。（生日願望？）我希望可以成為一個唱作人，好似我嘅偶像李榮浩先生，可以喺音樂上達到領域同成就。」力臻亦很開心可以跟黃明德一起慶祝，生日願望是身體健康，亦希望自己的歌曲繼續進步，令大家更認識和喜歡力臻這個人。
