江若琳（Elanne）去年6月為老公蕭唯展誕下兒子蕭立鈞（Owen）後，一直專心相夫教子，直至日前，她在社交平台宣布回歸樂壇，頭炮推出《一直留在心底的事》。今日，新歌終於正式面世，並現身新城廣播，接受由昆頓主持的《說故事的人》訪問。
相隔7年，Elanne重新出發推出新歌，「大家有冇試過問下自己，18歲嗰年有冇許過一個願望，大個想做咩，到你大個，你又做唔做到呢？其實都係好多人嘅經歷，包括我自己，我好希望用番第一日出道嘅歌手身分（入行當年只有18歲）唱歌畀大家聽，原來我好鍾意唱歌，以前有好多遺憾喺當中，好多時因為一啲矛盾，或者為咗生活，多次被迫放棄唱歌，點解我要過五關斬六將先可以唱到歌呢？既然所有嘢（跟舊東家的合約糾紛）都完結咗，雨過天青，我好想為自己活一次。」
回想自己低潮，她遇上蕭唯展，兩人挽手步進人生另一階段，及後跟舊公司打官司，當官司結束後，Elanne有了Owen，「今年終於完結晒所有嘢，小朋友大到咁上下，而且點解好想唱番歌，因為我個仔好鍾意我唱歌畀佢聽，佢好似我Fans咁，由衷地好安慰咁拍手，有一刻我望住佢諗，如果阿仔大個，其實我有冇一樣嘢令到佢好驕傲呢？又有冇做過令自己驕傲嘅事呢？我希望阿仔大個嘅時候，可以話佢聽，無論喺邊個階段，只要有一個夢，你仍然可以去追，當然你要有一個好好嘅緣份同契機啦，而我就咁啱遇到而家公司嘅團隊。」
其後，Elanne接受《新城八大家》訪問，談及重踏錄音室的一刻，她感到很神奇，「覺得好似好遙遠但又觸踫到嘅事，今次有機會行入錄音室，我覺得好難得同好珍惜，同埋我嘅心態好放鬆，因為我純粹做緊一件自己好熱愛嘅事，而且自己有咁高嘅參與度，完完全全係我自己嘅嘢，我應該要好好享受。（老公有冇畀意見？）佢好放心畀交監製，當我哋做好晒，佢就聽呢首歌，佢好開心，佢話『我聽呢首歌嘅時候，覺得我大個咗！』。」她又指錄音的時候，老公攜同Owen到錄音室，給她一個驚喜，「原來佢一直聽緊我錄音，好專心咁聽，有MV睇，佢又一齊睇，睇完就拍手掌，佢好支持，係我忠實Fans。」
