好多人討論巴菲特第二季大減蘋果公司持倉，係咪睇淡美股。如果大家想睇返巴菲特買賣蘋果股份既時間表，可以睇下面呢幅圖，呢個網做得唔錯，推介大家用下。
簡單講，畢菲特成本價係39.6元，成個交易，8年賺五倍。而蘋果既盈利，由2016年既450.2億美元，升至舊年既1000.91億美元。盈利翻倍而股價升咗五倍。
當然，公司因為有大量現金流而喺過去一直回購股份，所以每股盈利由巴菲特入第一注既時候既2.26美元，升到6.44美元，係升咗2.84倍。簡單既結論係，公司股價升多過盈利增長，而支撐估值上升嘅原因，係市場對未來業務嘅憧憬。
所以，我從另一角度睇，究竟蘋果公司，喺估值上係咪仍然值得持有呢？睇返蘋果近呢幾季既業績，增長開始因為手機換機減慢，以及中國市場市佔率下跌而跌落單位數。手機一直被垢病為無創意，食老本。直到最近，大家先開始憧憬Apple Intelligence 手機會為蘋果手機帶嚟突破。照時間線睇，巴菲特沽既時候，可能未知有呢樣野。但係如果您係佢，間公司盈利開始見頂，但股價因為市旺而炒上，咁係咪應該沽？而就算AI手機它日大旺，佢仲未完全沽哂，不是嗎？
仲有一單新聞，大家可能無跟開，就係蘋果喺美國面對緊美國司法部既一單反壟斷既官司，涉及我尋日直播時所講佢封閉式既系統模式。美國歷年有三單反壟斷案係比較哄動，第一單係千禧年既微軟，近年有Google(未判），而蘋果係今年新既。雖然外界睇法係罪成機會未必好高，但估值高既股，最怕萬一。
我既睇法係，巴菲特覺得有啲公司巴股價同盈利增長脫咗鈎，又睇唔到行業大幅增長既空間，仲有被反壟斷風險，便先沽為敬。
沽完蘋果，宜家有大量現金買唔到野。其實我以前推產品成日都有啲時候坐喺度半粒鐘都諗唔到聽日想推咩野，咁我就知道嗰市短期，頂頂地。如果您手上既美股近年盈利無咩升，但股價升咗好多，不妨諗諗您同唔同意股神睇法。又講返果句，睇紀錄，股神沽美股無沽中石油咁勁。但事後睇返，佢清倉，總係代表佢覺得個行業周期/毛利見頂。之後間公司股價再升，往往同行業/毛利增長無關，可能係其他原因導致。
【關於 #何啟聰】
自小熱愛投資市場，大學時期獲得多個投資比賽獎項。因緣際會下加入投資銀行從事衍生工具銷售工作及投資者教育工作十九年，曾任職荷蘭銀行、蘇格蘭皇家銀行及瑞信香港董事。由興趣演變成事業，離開崗位後有更多空間分享理財投資看法，歡迎交流。
