歌手徐嘉蔚日前現身新城廣播，接受由麥卓華主持的《原來生活好快樂》訪問，宣傳其新歌《虛偽光彩》。在現今社會上，或者有不少人選擇戴上面具，收起最真實的自己，在人前呈現出不一樣的自己，徐嘉蔚認為這不是虛偽。
「每個人對住自己、家人、朋友、上司都有唔同嘅面孔，例如對住朋友會玩得開心啲，對住上司會認真工作啲，我覺得唔同嘅面孔又唔等於虛偽，有時啲人批評一個人假或者真性情，呢啲嘢都係好無謂嘅事。」
面對家人或朋友的面口會否有所不同？徐嘉蔚說：「對住啲friend，我會粗魯好多，因為通常都係打機，打機嘅時候，嬲起上嚟一定係鬧，所以會有唔好嘅面向出現。」
原來這個真個性，外界是很難見得到，徐嘉蔚坦言希望每個人都喜歡自己，故此會選擇刻意將自己隱藏的想法、不表達情緒，「我以前覺得咁樣會令少啲人唔鍾意我，但其實反而會令到大家唔認識我，朋友同我講我係一個要大家認識咗我，先會知道我個人有趣，可能我有少少天生黑面，令到大家覺得我氣場好強，所以我係要拎番自己嘅情緒同想法出嚟，寧願大家聽完唔鍾意我，好過我咩都唔講，大家唔認識我。」
徐嘉蔚透露最難表達是悲傷的情緒，「嬲係ok，我係一個唔會喊嘅人，好自然㗎，情緒直接帶我去嬲同忟，但我做呢首歌嘅過程中，我同作曲人Vicky（馮穎琪）傾過我嘅諗法，除咗畀佢了解我之外，我都了解自己多咗，我終於知道點解自己釋放唔到（悲傷情緒）出嚟，同埋點樣釋放出嚟，我開始識得發放自己嘅情緒，所以喺成長上有好多嘅得著。」
圖片：新城
