今年3月正式出道的樂壇新人林芊瑩（Irene）昨日現身新城廣播，分別接受由麥卓華主持的《原來生活好快樂》，以及由T.MAX主持的《得閒high tea》的訪問，並宣傳兩首歌曲《Let Go》和《有心理準備》。
提到在《有心理準備》MV中，Irene的頸上牽著⼀條鐡鏈，她解釋代表一個枷鎖，自己給自己的壓力、包袱，「我份人都幾Chill，冇乜所謂，可能呢個階段未有太多嘢可以發生，所以冇乜包袱。（去到年尾嘅樂壇，或多或少都有壓力？）一定有，但係好壓力，今年起碼有個目的，就係有資格行到去嗰個位。」
入行只有四個月的Irene，她直言歌手生活跟以前的確有點不同，「Social Media，我唔係憎，我唔知點樣話畀人知我好鍾意唱歌，唱好歌係基本嘅事，而且Social Media要經營得好好，要話畀人知你係點樣嘅人，除咗唱歌之外，仲有乜嘢可以加強你嘅特質，唔係純粹你Enjoy唱歌、叻唱歌就得。」
Irene在唱歌方面無庸置疑，但原來在她小時候竟然是五音不全，在幾個「不甘心」的情況下，造就今日的她，Irene說：「我細個係五音不全，再加上係『鵝公喉』聲，以前阿哥啲同學打嚟屋企問佢功課，佢哋以為我係阿哥，因為我把聲好沉，我好唔甘心，同埋當時小學嘅我，好想參加朗誦比賽，但係老師唔肯揀我，幾次嘅挫折，我開始自己練聲練歌，當時聽容祖兒、HotCha、G.E.M.（鄧紫棋）、江若琳，日聽夜聽，模仿佢哋唱歌，慢慢調教番自己把聲，原來真係有用，去到五、六年班，唔知係咪嗰屆冇人參加朗誦比賽，老師就畀我去；當初好多積積埋埋嘅唔甘心，畀老師睇唔起，把聲不被認同，調教番把聲好聽，可以去朗誦，中學時候參加歌唱比賽，仲要攞埋獎，好多嘅唔甘心，颷咗而家狀態嘅自己出嚟。」
