許廷鏗（Alfred）早前在新城廣播，接受由黎莉主持《勁爆樂勢力》錄音訪問，宣傳新歌《聆聽世界這分鐘》。今次Alfred負責填詞，他表示夜闌人靜，或者當自己沉寂的時候，通常都會抒發一些情感的事，「今次都係凌晨時分寫出嚟！其實喺網上世界嘅我，係重感情，但日頭或者見於人前嘅我，會比較理性啲，冇咁入咗情感的禁區入面。」
人大了，經歷了兩年的疫情，發現要忘記是很容易，不要依靠人腦，「我喺呢個歲數最感受到，唔係唔想記住，原來有啲嘢係要用文字、相嘅記錄睇番，係好有意思。」
這首歌的誕生，源自於好多朋友離自己而去，「選擇離開嘅朋友，都幾爽脆，對我嚟講係要消化，因為我有投放過感情入去，我相信大家嘅友誼唔會變質，但變化確實係會有，始終唔會好似以前咁，話想見就見，最簡單係有時差。」
Alfred以「師傅到」來形容今次的創作思緒，「突然間個靈感就撞咗落嚟，因為呢首歌我收咗好耐，之前有畀過人哋填詞，收到初稿之後，我想盡善盡美，本身我想調整，但係我好似『師傅到』咁，就爆咗成份詞出嚟，我寫完係有少少呆咗，好似突然間入咗神，再睇番，我自己都諗『點解會寫啲咁嘅嘢出嚟？』，我都覺得有紋有路，言之有物，其實我唔係好意識到係自己，我而家唱番都覺得歌詞幾到肉……我冇失禮阿爸阿媽咁多年供書教學。」
