張敬軒近日展開《The Prime Classics HINS CHEUNG LIVE張敬軒演唱會》美加巡迴，今次場地選擇在拉斯維加斯Caesars Palace的The Colosseum，據知，該場地已多年未有邀請華人歌手到場演出，難怪軒仔表示既榮幸又興奮，而且亦覺得別具意義，「今晚可以企喺呢個舞台上面，好開心，我仲用Adele嘅化妝間同埋坐佢張櫈㖭呀！」
相隔一年在拉斯維加斯開騷，偏偏遇上當日微軟死機，軒仔坦言感謝各位歌迷排除萬難的到來，「多謝大家不理千里、萬里嚟到拉斯維加斯嚟睇我嘅演出，知道增加咗佢哋嚟嘅難度，有啲要飛廿幾個鐘、有啲飛咗去某個地方，然後要坐十個鐘頭車到，各式其適以唔同嘅方法抵達演唱會場地，好彩大家都可以齊齊整整嚟到。」
當晚演唱會歌單除了新歌《青春告別式》，亦有不少軒仔的代表作，如《櫻花樹下》、《笑忘書》、《餘震》等，都變成「大合唱環節」，當大合唱完《餘震》後，軒仔興奮地說：「你哋知唔知啱啱嗰刻知唔知發生乜嘢事？我喺台度，好多朋友同我一齊唱呢首歌，突然之間見到呢位外籍女士，佢識唱《餘震》呀！佢真係好犀利！突然間令到我覺得自己好似一個外國明星，好犀利呀！我第一次見到有外籍人士唱我啲歌，除咗我『遮遮』之外。好神奇！我想話，你（外藉女士老公）都真係好有福氣，你老婆愛你愛到連廣東歌都學。」隨即全場歡呼。
在落台握手環節中，軒仔向歌迷千叮萬囑要冷靜，事源是去年新加坡站的「陰影」，他笑說大家可以不用錫住他，但最緊要錫住他的咪高峰，「上次我哋喺新加坡，因為大家太熱情，已經撞跌我支咪，我支咪特登send去德國整，整咗我兩隻勞力士嘅價錢，所以希望陣間大家唔錫住我唔緊要，但一定要錫住我支咪，知唔知？哈哈。我好易搞嘅啫，但係我支咪難搞。」幸好軒仔的歌迷十分聽話。
此外，軒仔帶了T恤送給歌迷，更「效法」Adele去年在演唱會上，向歌迷派發T恤的方式，不過軒仔這次是「加強版」，他笑說：「Adele送禮物送T恤畀觀眾係有支槍嘅，一射就射到好遠，今次我冇準備到支槍，但我準備咗一支炮！因為佢應該可以射到好遠，哈哈。好彩今晚唔係好多小朋友喺度啫，事不宜遲，呢個時候我請我支炮出嚟先，呢個美國friend好勁，佢可以射得好⋯⋯呀，唔係，揈得好遠㗎。」他瘋狂將T恤拋向觀眾，氣氛熾熱，有歌迷大叫「拋埋軒仔」，這個美國朋友立即抱起軒仔作狀將他拋出，最後，軒仔安全於台上着陸，「嘩！嚇死我呀！你哋知唔知我咁大個仔第一次俾人抱起。」引得全場爆笑。
圖片：大會提供
