《聲夢傳奇》歌手冼靖峰（Archie）日前到新城廣播，接受由譚玉瑛、何基佑、黃筠兒主持的《QK玉瑛室》訪問。談及Archie近日推出新歌《無意冒犯》，他透露歌詞內容是自己18歲時的親身經歷，「嗰時我鍾意咗一個女仔，用咗一年時間去追佢，我哋每日都會互傳短訊，好似拍拖咁，但最尾我都冇開口，因為我覺得跨越咗條線之後，會連朋友都冇得做。」
何基佑聞言即取笑Archie，「咁你咪白白服咗一年兵役？」譚玉瑛為Archie護航：「咁又唔算，佢都冇Serve人。」Archie再爆料，指自己因愛慕該女生，所以曾投其所好，對方的嗜好亦成為他的嗜好，「而且佢讀書好叻，我都要叻，要追趕佢步伐；之後我入大學撞番佢，有問佢知唔知我當年追佢，佢話『知，我等緊你開口咋』，不過問完後都冇再聯絡。」
入行差不多3年的Archie，演藝事業發展得十分順利，他亦希望在將來，可以做到唱而優則演，他說：「其實呢幾年我都試咗好多嘢，有唱歌、拍劇、主持同加入男團，多謝公司畀咁多機會我。」原來，Archie的家人最初擔心他只有三分鐘熱度，所以一直極力反對他入行，Archie續說：「而家起碼養到自己，短期內目標係推出多啲自己作品，嘗試演多啲唔同角色。」
詳細節目內容，請重溫7月12日，下午3-4時，新城知訊台《QK玉瑛室》節目，網址：https://www.metroradio.com.hk/MetroInfo/
圖片：新城
