鄭秀文（Sammi）昨晚（14日）在紅館舉行第三場《You & Mi 鄭秀文世界巡迴演唱會2023》（Rescheduled ），鄭融、周勵淇、胡蓓蔚、胡定欣、黃智雯，以及《九龍城寨之圍城》監製莊澄、邱禮濤導演等均有到場欣賞。
張敬軒獲邀擔任第三場的表演嘉賓，Sammi以「阿仔」來介紹軒仔，之後兩人合唱《笑忘書》，唱完後，軒仔禮貌地輕吻Sammi的手背。Sammi對軒仔說：「好多年前你做過我演唱會嘉賓，咁你嗰陣時叫做軒仔……而家就叫做軒公，即係升咗呢，仲要係幾何級咁升添！」軒仔回她：「我唔知呢個名喺邊度嚟？同埋我麻麻地呢個名，我覺得起碼要去到阿公嘅年紀先啦…網絡花名！」
Sammi指頭兩場的表演嘉賓都是新一代歌手，軒仔鬼馬地笑說：「其實我讀緊書嗰陣都有睇《大頭綠衣鬥殭屍》……而家我開騷，有時啲後輩嚟到，例如噚晚嗰個後輩歌手（林家謙），佢話9歲聽我首《酷愛》！今晚輪到我，山水有相逢。」即時惹來全場爆笑。
及後，軒仔在台上衷心感謝Sammi，指她是恩人，「其實唔多歌手會帶我呢啲新人出埠表演，但我好開心，當年我仲係新人嘅時候，Sammi帶我去馬來西亞做佢演唱會嘅表演嘉賓，我好多謝佢。」Sammi說：「其實一代一代咁樣帶出嚟，你而家都係大人，要帶新人出嚟！」然後軒仔唱《隱形遊樂場》。
在演唱電影主題曲環節中，Sammi唱出過去10次提名金像獎最佳女主角獎項的電影歌曲時，看見電影片段和全場觀眾大合唱，一時感觸起來，淚水不停滾下，Sammi說：「好多謝你哋替我高興，唔知係咪人老咗就容易感觸，頭先睇返一啲自己電影嘅歷程，嘩，原來我嘅青春、我嘅少艾、我畢生嘅努力都放咗喺工作裏面，一眨眼就已經過咗30幾年。我今日開演唱會，見到依然有咁多人支持，一直陪伴我成長嘅你哋，我覺得好感觸和感動，令我覺得將我青春奉獻晒喺工作上面係好值得。好多謝由我蛋白質少女，嚟到今天已經係中年婦人，你哋都仲咁支持我。」當Sammi唱《萬物有時》更淚如泉湧，幾乎唱不下去，全場歌迷掌聲和歡呼聲打氣。
圖片：大會提供
