新城廣播節目《開心大派對》主持之一的思敏，今日邀請戴祖儀（Joey）在節目分享玩空中瑜伽，並為MBO TV錄影節目。席上，思敏悉心教導Joey做樹式（瑜伽動作Tree Pose）時，叮囑她要找個平衡點，保持呼吸，當Joey落地時，她笑說：「貼地真係好，做人真係唔好太離地。」及後，Joey在思敏指導下，做出倒掛蝴蝶式時瑜伽姿勢，Joey不禁說：「我覺得面珠墩遮住對眼喇！」
事後，Joey接受《新城八大家》訪問時，她表示：「我個腦非常充滿血液，我覺得倒吊嘅難，係在於面部管理，我諗會多咗好多黑圖，不過係一個好好嘅挑戰，同埋空中瑜伽拉到筋又練到肌肉，係一個好好嘅運動。（會唔會Keep住學？）都想。」由於將會接演一個專業型角色，Joey最近要密密操Fit自己，鍛鍊肌肉，「講到明，就算著背心，都要有手臂嘅線條，所以而家主力係健身操肌，開始大約兩個星期，但我得一個月時間。」
思敏在2016年開始接觸瑜伽，一年後考獲導師牌，「當初因為要減肥，而甫士好靚，想打卡，所以去學瑜伽，本身我細個係跳舞，筋會比較柔軟，所以容易上手啲。」思敏指自己最高峰時期，體重達140多磅，接觸瑜伽後，的確清減不少，身體狀態亦好過以前。
會否叫薛家燕挑戰空中瑜伽？思敏笑說：「試過喇，佢挑戰空中瑜伽，當然啦，你唔好預佢飛來飛去嗰啲啦，但佢做到瑜伽動作，雖然佢年紀唔輕，但都肯去嘗試，呢個係值得欣賞。」問到Joey的瑜伽姿勢如何？思敏給她80分，「頭先教佢拉筋、樹式、90度空中坐姿，係鍛鍊肚腹肌，瑜伽同佢嘅身高都好啱，係要全集中呼吸，頭先同Joey講要保持呼吸，因為呢點係好重要。（覺得Joey做成點？）可以接受，同埋佢唔驚，有啲學生一離地就好驚，嗌晒救命，佢好肯去試。」
圖片：新城
