新城DJ T.MAX（海淦清）今日以歌手身分推出新歌《大細路》，為了大搞綽頭宣傳，T.MAX特意設計一個扭蛋機，認真花盡心思。T.MAX坦言「BB」出世，就是緊張得睡不著覺，「其實我最深感受係《卡拉O！BABE》（上星期五舉行），我第一次用歌手身分，對住咁多觀眾、聽眾唱歌，我好耐冇手震，但嗰日我震咗。」
今日，T.MAX接受《新城八大家》訪問，他透露作品的靈感是來自，3年前被前度女友責罵，「當時我喺屋企打緊機，佢突然之間鬧我『你可唔可以唔好成日掛住玩呀？屋企又多玩具，上次喺商場有間模型舖，你又走入去望，可唔可以成熟少少呀？』，我就諗『你識我已經係咁㗎啦！』，跟住好想寫首歌平反，大細路無罪。（鬧完之後就分手？）係呀，而家單身。」
T.MAX指自己兒時最瘋狂的，就是喜歡買遊戲機、遊戲碟，「我儲到一個大箱，嗰度差不多有5、60隻。（大約價值幾多錢？）當時我20歲頭，起碼幾萬蚊。（有錢仔？）唔係呀，我係直頭唔食飯都要去買遊戲碟嘅人，一個月大約有5000幾蚊零用錢，但我會用一半去玩；我細細個開始，骨子裡都係懶玩，啲人話我一笑就好𡃁仔，笑聲好純真。」
《大細路》曲詞都由T.MAX親自操刀，當作品交給自己的團隊時，他的唱歌老師高晨維（Cleo Ko，亦是炎明熹的唱歌老師）竟然踩他一腳，T.MAX說：「Cleo老師話『點解團隊要幫你做嘢？點解人哋想聽你啲嘢？有冇諗過呢個問題？你憑乜嘢畀人睇？你得兩、三隻歌，周杰倫出碟都寫50首揀10首啦，你憑咩？一係你一日寫一首畀我，你寫到我就幫你出！』，我真係唔大得，幾好勝，之後嗰10個月，我每日寫一首歌，呢個過程係好練習，之後就越寫越快，而家我手上有晒曲詞嘅Full Version歌，大約有5、60首。其實Cleo老師講得好啱，做新人只得一次，過咗就冇。」
今次順利錄音，T.MAX坦言要感激Cleo老師，「佢特登借咗佢屋企畀我錄音，我亦都好感激我嘅團隊，我諗出帶住扭蛋機周街行都幾好，跟住大家都頭痛，訂部扭蛋機好貴，有個成員諗點整，好彩有佢哋幫我完成呢個咁天馬行空嘅諗法化為現實。」
有了自己的作品，T.MAX直認恨攞獎，「因為太多人幫過我，所有嘢，得我一個係做唔嚟，呢啲人義無反顧為我付出，其實佢哋係冇得益，係幫我咋嘛，所以我好想攞到一啲實際嘅成績去證明畀大家睇，我想答謝佢哋，呢樣嘢好緊要，特別係我兩個老師，Cleo老師同Nic Lau（劉凱揚），因為我喺10年前係一個憤青，無論我做乜都好，佢哋都冇放棄我，所以我係兩個老師同音樂拯救返嚟；（而前度女友就畀咗靈感你寫歌？）哈哈哈哈哈，我會真心感謝佢，不過我唔開名，佢唔係圈內人。」
