馮素波（波姐）在1990年，由亞視過檔無綫，在首部劇集《今生無悔》中，與陶大宇飾演兩母子。近日，兩人聚首於《貼地嫲嫲馮素波》頻道，閒聊當年拍劇的點滴，原來波姐34年前的一句說話，大宇至今仍然謹記於腦海中。
大宇指：「我哋拍戲梗係有切燒豬拜神，現場有燒豬、有雞、有生果，我發現你淨係攞住個蘋果，我記得你當時同我講過一句說話，到今時今日我都仲記得，你話『大宇，做人呢，但求平過，所以我攞個蘋果就算喇！』，今時今日我再諗返起，又真係喎，做人嘅嘢都係一個過程，開開心心，最緊要身體好。」波姐指健康是最難買得到，所以她向來不求有功，但求無過。
兩人再度合作，是在《壹號皇庭II》，波姐飾演大宇的傭人，「同你拍完之後，我覺得你個人冇以前咁抑鬱，成日笑，嬉皮笑臉。」大宇承認當時的事業發展開始理想，「我開心，人真係會成長，當你入行嘅時候乜都冇，我哋又冇咩關係，做嘢一時時，今日做得好，我聽日接嘅嘢又唔好，久唔久又會畀啲好嘢你嘆，嘆完之後以為以後會好，原來又唔係，其實嗰個階段好辛苦，所以我都要多謝監製鄧特希，當時我同歐陽震華、蘇永康都問過鄧特希點解用我哋，佢話本身唔係用我哋，公司想用天王巨星，例如劉德華，但鄧特希好幫我哋爭取，如果真係搵劉生做嘅話，啲人就唔會睇我哋，佢就索性用晒我哋呢班捱咗好耐嘅後生仔，我哋就冇用好傳統嘅演繹方法，全部都係亂嚟。」難怪《壹號皇庭》系列這麼成功。
