新城廣播有限公司將由今晚（17日）起，逢星期一至五晚8時至9時，推出知訊台全新節目《傾心 ‧ 傾城》，並且邀請了已離開新城廣播逾10年的瑪姬和胡凱澄（Ame）出山開咪，還有「股壇小辣椒」的胡孟青（青姐）、女作家素黑，以及多功能藝人羅沛琪（Pinky）擔任主持。
逢星期一由瑪姬主持、星期二由青姐主持、星期三由素黑主持、星期四由Pinky主持、星期五由胡凱澄主持，5位主持分別在每晚，與聽眾探討城中熱話、分享心靈雞湯等故事，向大眾發放正能量。
日前，知訊台台長程凱欣與瑪姬、青姐、Ame及素黑為節目拍攝宣傳片，瑪姬獲邀重返「娘家」，她坦言感到十分興奮，更呼籲大家記得收聽節目，她說：「我離開廣播界都12年，到而家依然有人問我係咪返電台開咪，或者我一講嘢，佢哋就知道我係DJ出身，曾經有前輩同我講，話入咗廣播界就出唔番嚟，所以無論我喺出面做幾耐主持或者唱歌，都係搣唔甩DJ呢個身分，不過今次返新城開咪真係好開心，我仲會揀一啲好啱畀『絲打』同『天花板』嘅歌畀大家聽。」
至於同樣離開新城廣播12年的Ame，對「娘家」講心不講金，她表示：「佢哋未接觸我之前，我成日覺得自己仲會做番電台，突然收到呢個邀請係開心嘅，因為係新城廣播湊大我，所以我二話不說就返嚟喇，錢唔使講，好開心返自己『娘家』。」Ame又指現時太多負能量，故在節目中，以不同心靈雞湯去撫慰大眾心靈，希望帶出正向或者有愛的故事。
青姐是財經界一姐，平時講股市，怎會難得到她，不過今次她將跟聽眾們盡訴心中情，她說：「我會同大家講吓城中熱話，又會傾吓心事，雖然身在財經界，每日都見盡Money，但其實每日都有好多人或事好值得講吓，我哋會一邊聽歌，一邊傾偈，引起朋友共鳴或者反思。」而外表斯斯文文的素黑，除了是一位作家外，亦是一位心理治療師，首次擔任電台節目主持的她，會分享個案及治療方法，「可能又會講吓生死，沉重啲，如果聽眾有嘢想同我講，可以寫信嚟新城廣播或者FB留言，係一個好好嘅互動。」
圖片：新城
