谷婭溦由去年開始，展開她的「人性四部曲」音樂計劃，先有以假為主題的《Liar》，最近再推出第二部曲《我管你》，講述人生的真。昨日，她在新城廣播宣傳新歌，並接受《新城八大家》訪問，她指在疫情時，多了時間思考人生，不停研究人性的事，「其實都覺得幾得意，不如用音樂嚟表達啦；我睇咗好多人性嘅紀錄片，講人嘅真、假、善、惡，於是造就咗人性四部曲。」
這幾年，無論甚麼年紀的人，都開始追求自己的夢想，「我覺得做人係咪應該要做返自己呢？為自己嘅夢想去努力呢？當喺追求夢想嘅路上面，我哋都會聽到唔同嘅聲音。（你會唔會受到外界嘅影響？）我相信每一個人都會受到外界嘅影響，至於呢個影響大定細，其實我以前都受過，當遇到一啲唔好嘅聲音，例如我哋做藝人嘅，一定會畀人鬧，我哋點算呢？如果網上嘅人為鬧而鬧，我哋就選擇唔好聽。」
回想初出道時，首次遇到惡意批評嘅時候，谷婭溦不知怎面對，最後患上抑鬱症，「當時啲人鬧我廣東話唔得，唔識唱，垃圾，大陸雞，乜都有，就連我屋企人都鬧埋，當時我抑鬱好嚴重，諗過自殺，冇同人傾，一直收埋自己，懷疑自己係咪一個廢物。」問她怎樣爬起身？她續說：「我有睇過醫生，但係睇醫生係咪有用呢？其實爬返出嚟都係靠自己。」及後，谷婭溦選擇暫時離開香港一年，在中央戲劇學院報讀戲劇課程，讀完之後，漸漸覺得整個人比以前開朗不少，「因為喺嗰個時候，有好多表演課程，我可以釋放自己嘅情緒，我覺得自己好優秀。」
谷婭溦視香港為第二個家，選擇了這個地方，就要尊重這個地方的文化，於是她努力苦練廣東話，「所以今次寫呢首歌，我係以鼓勵為主，就算大家遇到唔好嘅事情，大家都唔好理。
