周吉佩在2014年迎娶前港姐黃彥欣，婚後育有一對子女，大女包包今年快9歲，細仔Jasper已經6歲半大。周吉佩經常在社交平台上載一家四口的幸福照，可想而知，就算工作有多忙，他會盡量抽時間享受家庭樂。
日前，周吉佩接受《新城八大家》訪問，他透露今年的父親節要在工作中渡過，笑言要夾期食飯慶祝，「未必正日嗰日可以食到，因為近排好多工作，仔女同太太唔需要特別送啲咩，簡簡單單就可以。」
談到往年的父親節，周吉佩表示收過包包自製的父親節卡，他甜笑說：「阿女Sweet啲，小情人吖嘛，佢會寫卡，做啲手作，寫『The Best Dad』，阿仔有年就試過畫咗朵花，然後剪出嚟送畀我，幾有趣，我全部都Keep起晒，因為呢啲係好珍貴嘅回憶。」
自子女出世後，周吉佩一直陪住他們成長，「我知道之後有佢哋自己嘅世界，未必再咁重視爸爸媽媽，所以我同太太講，呢10年時間一定要畀晒佢哋，一齊食飯、一齊玩、一齊成長，而且阿女步入青春期，自尊心開始重，佢多咗自主，所以我同佢嘅相處模式開始轉變，開始傾偈傾心事，可能因為我以前同爸爸都係用一個『朋友』方式相處，而影響到我而家同仔女嘅溝通都係用呢個方式。」
他還分享了一個Jasper最近的趣事，「唔知點解阿仔近排突然好扭計，要同媽咪一齊瞓覺，其實佢走埋嚟瞓覺好麻煩，因為張床唔夠大，我老婆唔肯同佢瞓，佢就喺房喊，喊喊吓就開我房門話『我想一齊瞓』，我老婆就發脾氣，我都想發脾氣㗎，你知畀人搞醒咗會好燥，但轉個頭我就搭住阿仔個膊頭，問佢『點呀你？咩事呀？』，佢話『我驚個窗簾，有個影，我驚Alien，我知冇Alien，但我好驚囉！』，咁我就明喇，我陪住佢瞓一陣，同佢傾偈，其實因為佢心野，佢好想玩，好想有人陪佢，我了解咗之後，我冇鬧佢，第二日再同佢傾，但第二晚佢又係咁，於是晚晚同佢傾偈，喺咁樣嘅過程入面，我對佢了解更多，所以我偏向鍾意咁樣嘅相處。」
至於周吉佩與爸爸的關係，就如好朋友、好兄弟一樣，感情深厚；無奈，吉爸最後被癌病帶走，對周吉佩而言，簡直是椎心之痛，一切的感覺非筆墨能形容，與爸爸的美好時光，只能埋在心坎裏。回想昔日與爸爸慶祝父親節，周吉佩帶點自豪表示：「記得當年9歲，我煮咗一餐飯畀佢食，煎蛋、煮雞翼、炒個菜，我真係識得落蒜頭爆香個鑊先，仲有煲飯、叮薄餅，好好笑，所以我最記得呢一次，爸爸放工返嚟見到咁樣，佢好開心，而家我諗番，如果我啲仔女煮畀我，那怕嗰樣嘢好簡單，煮個麵，我都會好窩心！不過我冇機會再咁做，冇機會再煮畀爸爸食。」
