屈臣氏蒸餾水呈獻《新城唱好海洋公園音樂會 周禮茂作品展》昨晚在海洋公園怡慶坊舉行，陳慧琳（Kelly）、楊千嬅、張敬軒、林奕匡、胡鴻鈞、葉巧琳、黃淑蔓、周吉佩、冼靖峰、余宗遙、周子涵、黃明德、鍾柔美、詹天文、林智樂、孫漢霖，獲邀現身演繹周禮茂的作品。
作品展甫開始，台上播出周禮茂預錄的致謝詞，並以由他填詞的歌曲《無中生有》掀起序幕。打頭陣的Kelly唱出《一切很美只因你》、《風花雪》、《有福氣》。事後Kelly指自己在不同的階段，都有跟周禮茂合作，「《一切很美只因有你》係我啱啱出道，佢寫《風花雪》畀我，就係我衝刺期，寫到《有福氣》，我就差唔多結婚，所以我好榮幸同周禮茂合作，我最鍾意就係收到佢啲歌詞，因為佢係親筆寫，佢啲字好靚，我係珍而重之Keep到而家，希望可以同佢繼續合作，我而家結咗婚，睇吓可以收到佢咩詞啦！」
胡鴻鈞、林奕匡、黃明德、周吉佩則先後演繹《沙沙的雨》、《來來回回》、《你是我今生唯一傳奇》、《祝君好》、《沒有你還是愛你》、《男人最痛》、《情來自有方》。林奕匡表示一直以來，自己深受周禮茂的作品影響，「喺我完全唔識中文嘅時候，就係聽你寫嘅作品，令到我學到好多中文，感謝你咁多年嚟，為香港樂壇出咗咁多力，影響好多人，希望下次有機會唱你嘅作品。」而周吉佩指自己參加《中年好聲音》時，總會有周禮茂的作品出現，「我相信呢啲係時代嘅經典作品，而家再聽番，呢啲作品都係經歷到唔同嘅年代，所以我喺台上都多謝周老師陪住我哋好多歌手成長，所以我好榮幸可以參與到呢個音樂會。」
千嬅亦唱出《傷信》、《乾脆》及《3650夜》，掀起歌迷滿滿集體回憶，千嬅說：「我入行初期﹐已經同周禮茂合作，印象中嘅佢係好有耐性，亦都係一個好感性嘅人，說話唔多，但係聽佢講嘢會了解到佢內心嘅一面；當時我錄音，冇經驗，唔識去了解一首歌，佢會講好多故事去引領我哋，達到嗰首歌嘅情感之處，所以佢係一個非常之好嘅監製。」
至於黃淑蔓、周子涵、葉巧琳則唱出《談情說愛》、《夢中人》、《繾綣星光下》、《沒結果》和《李香蘭》，適逢昨日是黃淑蔓生日，新城知訊台台長程凱欣上台向她送上生日蛋糕，並且播出鄭秀文預先錄影祝賀片，段，搞到壽星女非常開心，「我生日願望係希望每年都係生日中度過，今年就特別深刻，因為我喺台上聽到大家唱生日歌畀我。我本身係王菲小fans，知道要唱《夢中人》，我有少少驚，結果我用自己嘅方式去演繹，希望大家多多支持。」
輪到《聲夢傳奇》的冼靖峰、鍾柔美、詹天文及林智樂等，跳唱近8分鐘節奏強勁的串燒歌，炒熱全場氣氛。原來洗靖峰最喜愛《李香蘭》，「本身呢首歌係玉置浩二，傳到嚟香港，由周禮茂填粵語詞，我反而鍾意粵語詞嘅韻味多啲，因為呢個韻味，令我更記得呢首歌。」
壓軸出場的張敬軒，他演繹了《靜夜的單簧管》、《邊緣回望》和《只要我活過哭過》。最後，周禮茂上台表示，他坦言很感動，覺得人生已經真的不錯，此時，新城知訊台台長程凱欣到台上向周禮茂獻花，他接過後續說：「唔知會唔會有第三次嘅作品展？」在旁的張敬軒立即回他：「一定會有！」事後，張敬軒接受《新城八大家》訪問時，他透露有心聲要向周禮茂說：「周生，希望你唔好咁怕醜啦，你一怕醜，我就唔敢同你講嘢，唔知係咪你唔想同我講嘢；好多謝你過去咁多年，將自己青春、時間、感受、人生經歷化為美好歌詞，去令我哋好鍾意聽廣東歌嘅樂迷，可以喺咁有養份、咁好嘅文字質量入面成長，亦為廣東歌奠定好高嘅標準，我希望喺不久將來，我會有你嘅作品。」
圖片：新城
