周吉佩將於本周六晚為「新城唱好音樂會2024」《周禮茂作品展》演出，今日現身新城廣播時，他坦言為演出感到十分緊張。周吉佩指參加《中年好聲音》時，周禮茂的作品經常有出現過，例如《祝君好》、《沒有你還是愛你》、《男人最痛》等經典作品。
「周老師係一個殿堂級嘅作詞人，佢嘅作品，喺我哋人生入面出現過，有日我同周老師傾，我話好多謝佢畀咗咁多歌曲畀我哋，呢啲歌都係我哋朗朗上口，陪住我哋成長，今次能夠參與，我好開心，好興奮，當我知道我要唱佢其中一首代表作嘅時候，我係好緊張，我同周老師講我好驚唱得唔好，因為係一首好經典作品，但係佢好好，好鼓勵我，叫我畀心機，呢首亦係佢好鍾意，我話『得，我返去練幾百次都要練好！』，同埋呢首歌嘅原曲歌手，都係我好鍾意，所以係有壓力。」
最近，周吉佩推出新歌《Falling For You》，是一首講述一見鍾情的歌曲，他笑言是現實中的寫照，「咁多年，我都好相信，我同太太係一見鍾情，當時喺卡拉OK房，有位朋友介紹咗佢，佢就開門入嚟，卡拉OK房又暗，但啲射燈射落佢塊面度，好似女神光，開門又有氣流，女神風又出嚟，可能就係呢個畫面，我就將呢幕同導演講過，擺咗同樣橋段喺MV入面，但MV係偏搞笑方法演繹，亦都參照番周星馳大師嘅電影橋段，我就係做侍應斟緊茶，迷咗咁望住佢，類似係咁。」
問到有否想過邀請太太擔任MV女主角？周吉佩說：「佢唔肯，佢話好想低調啲，我唔係想成日提住佢，只係太太喺工作成日同我一齊，佢係我不可或缺，所以有時係提多咗。（首歌送畀太太？）我冇刻意，本身有咗歌先，係一首泰國歌，我就分享我嘅愛情經歷畀填詞人聽，所以全部嘢都好中，其中一句『凝看著你令我 仆了一下』，其實真係發生過，所以我唱會好有畫面，特別投入。
