70年代拍廣告入行的余安安，拍過不少劇集、電影，相信大家還記得她在改編自金庸巨著《書劍恩仇錄》中，飾演香香公主一角，這套劇還有鄭少秋演陳家洛、汪明荃演霍青桐等等；余安安表示香香公主角色，的確為她帶來名氣，是她最喜愛角色之一。
早前，余安安接受《香港演藝人協會》訪問，她透露當年只有17歲，獲得前輩愛錫，「返屋企睇好對白，後生記性好吖嘛，去到片場就做囉，好彩呢個角色蠢蠢哋，唔需要咩演技，所以真係駕馭得到。」
原來她拍完之後，不喜歡香香公主一角，「過咗2、3年我都唔鍾意，因為我覺得佢（香香公主）太蠢，又唔識做戲，但係反而過咗好多年，我再睇番，又覺得啱喎，因為真係要一個乜都唔識去做，感覺先會出嚟，如果有演技或者識做戲，可能會冇咗嗰種感覺，香香公主無疑係畀咗我一個好好嘅開始，亦帶畀我好好嘅名氣，因為到而家為止，仲有好多人叫我做香香公主，佢絕對係我好喜愛嘅角色。」
之後的日子，余安安的事業發展順利，但去到一個位置，她直言看不到再有甚麼突破，加上拍劇的日子令到自己很疲累，於是她停下來，選擇了家庭，兩個女兒長大了，余安安對演戲仍會心癢癢，所以間中都有接劇、電影。
由於余安安在單親家庭長大，所以她特別注重家庭生活，現時已榮升外婆的她，每當見到孫兒，心都甜埋；日前在社交平台上載為了兩個孫仔生日和滿月，特別親手製作蛋糕慶祝，認真是個窩心的外婆！
