裕美今日在新城廣播接受黎莉主持的節目《勁爆樂勢力》訪問，宣傳新歌《最佳女友的自我修養》，她透露今次是自資6位數字，所以有好大的參與度。對於重踏錄音室的感覺，裕美笑說：「好緊張，有少少唔適應，不過監製好願意喺我身上發掘我獨有嘅嘢，然後再帶住我，睇吓點樣做得更好，我覺得呢啲係恩師。」
相隔13年再推出歌曲，裕美表示因為被男友林作訓練有數，「離開咗舊公司，有段時間係唔想再做呢行，其實我不嬲都好鍾意唱歌，但係人哋只係專注我啲八卦新聞，所以都心灰意冷；人大咗，我仲係好熱愛唱歌，如果我再做，而啲人係抨擊我，坦白講我會好難過，我心諗自己可唔可以承受到，鍛鍊到咁上下，再做就冇問題。（呢幾年被林作訓練得多？）可以咁講，同佢一齊都唔係咁容易，能夠捱到6年，白髮都生咗唔少，因為同佢要鬥智鬥力，學識咗好多做人嘅態度，硬踫硬係冇意思。」
對於林作早前曾揚言，如《最》一曲打入任何一個音樂排行榜頭幾位，就會向裕美求婚，裕美沒好氣地笑說：「佢咁樣講完，我都唔知上唔上好，（首歌而家上緊榜！）係呀，其實我諗緊，佢求婚啫，我可以拒絕㗎嘛，所以唔使擔心，解決咗呢個問題，同埋佢話攞唔到獎就分手，我都期待緊。」她透露林作媽媽聽過後，都大讚好聽。
此外，提到去年在日本與失散23年的日籍父親和田具久重聚，問她可有想過下月怎樣慶祝父親節？裕美說：「我都唔記得係父親節，但係6月16日，我正正喺日本錄一首日文歌，歌詞係圍繞爸爸，（邀請爸爸睇你錄歌？）爸爸喺大阪再入，我就喺東京，希望可以搵佢啦，因為今次係一個好短嘅Trip。」問到爸爸有沒有見過林作？裕美即說：「冇，一直唔敢介紹，但係媽咪同爸爸講『佢男朋友好唔靚仔』，爸爸話『男仔唔靚仔唔緊要，最緊要係叻。』但我其實幾鍾意靚仔，哈哈哈！
