林智樂（Felix）為宣傳最近推出的新歌《年輪海》，近日在新城廣播接受黎莉主持的節目《勁爆樂勢力》訪問，他指這是一首關於時間和成長類別的歌曲，「監製Cousin Fung叫我錄音嘅時候，當自己係一個好老嘅人，喺棵樹下分享自己嘅故事畀一班天真爛漫嘅小朋友聽，我聽到佢咁講就好有感覺，嗰一take覺得自己唱得最好嘅。」
今年20歲的Felix，在加入娛樂圈前，原來從未正式入過職場，故此一直以來，他以戰戰兢兢的心態走著，「要控制自己情緒同避免衝動，我有時會好冷靜，但有時都頗衝動，因為自己冇真正入過職場，所有人都好似訓練緊自己咁，當然有遇過好人、貴人同畀磨練你嘅人，每段經歷受過教訓之後，就會知道點樣避開佢。」
談到在《年輪海》MV中，Felix以牛仔布裁縫師演出，他透露整個構思是由公司同事提供，「今次好快已經知道首歌係講時間同成長，於是佢哋諗到牛仔布都要經歷好多重洗水、染、剪先成為大家見到嘅牛仔褲，同時間人生好有關係，都要面對好多唔同嘅難關，所以就攞嚟做MV主題。」
對於林德信（Alex）在MV中驚喜現身，問到為何會邀請對方演出？Felix表示公司得悉對方熱愛牛仔時裝，對牛仔布亦甚有研究，故提議找他演出，Felix說：「我話如果Alex肯當然好啦，跟住佢又OK，於是佢嘅出現就成為呢個MV嘅彩蛋。」
