楊千嬅近年專心發展內地市場，近日佢50歲生日選擇在香港與歌迷渡過，而呢個生日會千嬅用咗兩星期時間籌備，有過千Fans參加。在生日會中千嬅亦分享近年心路歷程，期間仲忍唔住落淚…
楊千嬅50歲生日感激歌迷 ： 今日來得嘅朋友，我知你哋已經係我家人
千嬅在生日會上獻唱了平日比較少唱的歌曲，包括：《火鳥》、《我係我》、《直覺》、《孔雀》、《偷生》等，然後講到一早決定了在香港和歌迷會度過50歲的生日：「我係香港出生長大，我一早決定50歲一定要係呢度同家人及朋友過，好多謝你哋陪我過呢個生日，我真係冇諗過，自己唱歌會唱到半百，哈哈，除左感恩、感激，呢段咁長人生路程，回頭望係非常精彩，亦從沒遺憾。今日來得嘅朋友，我知你哋已經係我家人， 感謝你哋多年來選擇咗我，聽住我嘅歌，同我一齊成長，我好耐冇喺香港表演，我唔想喊呀，喊完鼻涕又變痰，唱唔到好唔抵。」
楊千嬅罕談新時代網絡風暴：係一個好震憾嘅經歷
然後千嬅又再分享呢幾年嘅心路歷程，仲忍唔住爆喊，全因為經歷咗好大的考驗，仲話日子並唔容易過：「你見到我唔係好出嚟，躲埋咁耐，時肥時腫，比人影到畸形樣，哈哈哈，新時代網絡風暴係一個好震憾嘅經歷，我乜都遇過晒，幾十歲人我同自己講，有咩未見過？ 真係低處未算低，當我經過呢段日子，我發覺自己真係好強大，今日好感恩，上天比我係有力氣時，經歷呢個浩瀚人生。」
楊千嬅試過死頂 仲見證自己CD碎到一地都係：心好痛
千嬅仲話試過死頂，刻意扮開心，結果嚇親身邊唔少人：「見到自己嘅CD碎到一地都係，心好痛，連朋友都唔敢再關注。你鬧我冇問題，唔好鬧埋我啲朋友，諗住一個人撐唔好害人。我曾經覺得好恐怖，選擇『熄機』唔睇唔理唔聽，休息畀自己時間消化。」至於由低谷再企返起身，千嬅坦言全靠一班歌迷拉返佢起身，透露有一位歌迷將佢多年來上台講嘅得獎感受剪輯成3分鐘片段畀佢，結果一路睇一路喊：原來我同人講過嘅嘢，曾經幫到人，最後今日幫番我自己，我發現困難時只有係自己救自己，唔好放棄自己。我希望你哋可以愛自己，要有健康身體，永遠面對挑戰最高難度時，加油提升自己嘅能量，遇到最壞最唔開心嘅事，都係可以逆轉。入得呢個會，有番咁上下POWER，我進化你哋同我一齊進化，一齊進步！呢個係『千嬅群英會』嘅精神，我五十歲都做到，你哋咁後生，你哋可以活得更精彩！」
