喬寶寶今日在社交平台出post，指自己明晚6時30分，將在紅磡舉行首個個人演唱會，其實喬寶寶是參與由新城廣播創作總監葉文輝（啤梨）主持的新城節目《卡拉O! BABE》。啤梨更為他設計了一張海報，搞笑地寫上「首個喬寶寶個人演唱會」，旁邊有個QR Code，大家只要掃一掃個條碼便可以收聽喬寶寶的鬼馬歌聲。其實這張海報非常吸睛，用了喬寶寶後生時，靚仔又瘦的相片，有網民留言「好似黃凱芹」。
喬寶寶接受《新城八大家》訪問，他笑說：「有啲人話我似美斯，又有啲人話我似麥巴比，其實最好就係似自己，因為如果似邊個，但係又做唔到佢啲本色，咁又唔係幾好意思，有時嘲笑自己會好啲囉。」問到會否唱黃凱芹的歌曲？他語帶相關說：「本人鍾意張國榮多啲，所以我會唱佢啲歌多啲。」
提到他今次的個人演唱會，將會預備多少首歌？他表示：「我又唔係專業歌手，都係《殘酷一叮》（無綫選秀節目）出嚟，今次唱4、5首都走唔甩，會棟篤唱，即係會講吓開心嘢、笑料，跟住唱吓歌。我入咗行都兩個世紀，都未試過開個人演唱會，今次有呢個機會，我都想表演吓，因為自己都老喇，做咗阿爺添，都唔知幾時有機會，難得新城畀機會我。」喬寶寶在節目上將分別獻唱張國榮的《不羈的風》及《Monica》、葉振棠的《勝利雙手創》及阿牛的《至冧情歌》。
事前會否練歌和練氣作準備？喬寶寶說：「其實都唔使點練，識我嘅人都知我勝在甩嘴、甩key、甩歌詞，啲人都係鍾意聽我講吓嘢，開開心心搞吓笑，香港人都易話為。」
喬寶寶指自己熱愛中國文化，讀書時期亦與一個本地女仔拍拖，可惜最後遭母親棒打鴛鴦，他說：「佢話阿仔，雖然我哋離鄉別井，但我哋一定要搵番自己人，我好聽阿媽話，接受唔到我老媽子每一滴眼淚。」後來喬寶寶母親介紹3位女孩給他，分別是加拿大印度西施、英國印度西施及印度西施，他娓娓道來：「加拿大嗰位係千萬富婆，打跛腳都唔使憂嗰啲，但有個小朋友，我話我咁細個，唔使Buy one get one啦，等我自己嚟；第二個英國人係百萬富婆，但同你（啤梨）體重差唔多，不過年齡大我10年，我話第時帶出街話係我老婆定阿媽？恐怕洞房時會壓親我。」
至於第三個印度女孩則成為了現任「喬太」，喬寶寶指：「因為我都想了解多啲印度文化，我第一次返印度係4歲，第二次返去就結婚，嗰時係18歲半。」怎料返家鄉籌備婚禮翌日，喬寶寶即遇上一次慘痛經歷，他說：「因為我哋都鍾意成個土地，就試吓飲印度水，點知第二日水土不服，我頭一星期屙得好淒厲，第十日要結婚，好彩第七日就開始好返。」這次變成「瀉寶寶」令喬寶寶畢生難忘，他呼籲：「所以大家去印度最好飲蒸餾水或礦泉水。」
圖片：FB@喬寶寶 Qbobo
