為配合五一勞動節假期，新城財經台將有節目調動，於5月1日下午1時播放假日特備節目《新城廣播關注組》，由新城廣播總經理（節目規劃及頻道運作）朱子昭主持，其中及至下午1時30分新聞簡報之後，介紹知訊台《沿途有我》節目，並邀請《沿途有我》節目主持歐陽德勛接受訪問。
受馬浚偉先生力邀開咪 : 好感恩夢想成真
現年57歲的歐陽德勛，於1984年參加新秀歌唱比賽入行，之後簽約唱片公司成為歌手，再獲引薦加入電台做DJ，曾在多個電台擔任音樂節目主持，經驗十足的德勛，月前在新城廣播首席營運總監馬浚偉先生邀請下加盟新城廣播，並於星期一至五晚上9時至10時，主持節目《沿途有我》。德勛接受朱子昭訪問時，大談獲馬浚偉先生力邀的經過，他表示：「好感恩夢想成真，我真係以為唔會再做番電台廣播，仲要係一個咁有規模機構，馬生只同我講，幾時做節目，播咩由我自己決定，真係自由到不得了，佢叫我做番自己style，總之好聽就得，剩係唔准我播佢啲歌。」
封咪10年重返舊崗位 : 我仲係流住做廣播嘅血
而《沿途有我》已播出個多月，雖然德勛在樂壇和廣播界經驗豐富，但他謙稱自己新如一粒塵埃，更大讚新城廣播這個大家庭給他有家的感覺，他說：「我曾經去過不同地方做過廣播，但呢到全部嘢對我來講都好新鮮，因為自己停咗一啲日子冇做電台，我同啲朋友講，我仲係流住做廣播嘅血，簡單啲講，我係姣婆，好恨開咪。」
已封咪10年的德勛，坦言經常心癢癢想重返舊崗位，他表示：「都苦等咗頗長日子，一直冇人搵我，有時聽收音機，坐車或聽到人做節目，特別DJ播歌，我會即刻諗如果係自己，我會夾呢隻歌，當時嗰啲雞皮就出晒嚟，我會感動到自己。」
憶述DJ入行辛酸史 : 要通宵喺電台瞓
德勛又憶述初入行做DJ，由於當時錄音室不多，所以經常要三更半夜返電台錄音，甚至要提早回去排隊等候錄音室，德勛表示：「有時仲要通宵喺到瞓，要輪流排；如果有前輩DJ畀嘢你剪，你已經係覺得袋錢入你袋，呢啲係錢都買唔到，如果畀人鬧，我哋唔敢出聲，佢肯鬧你，表示佢肯教你，不過我冇遇過，我係感恩嘅。」
編輯 : 謝明蕙
